Pages

Thursday, 26 June 2014

மைக்ரோவேவ் ஓவன் டிப்ஸ் டிப்ஸ் / Microwave Oven Tips


மைக்ரோவேவ் ஓவனில் உணவுகள் வேகமாக சமைக்கப் படுவதால் சத்துக்கள் பாதுகாக்கப் படுகின்றன.எண்ணெய் இல்லாமல் அல்லது குறைந்தளவு எண்ணெயில் சமைக்கலாம்.

உணவை குறித்த நேரத்திற்கு அதிகமாக சமைக்கக் கூடாது.
சமைக்கும் பொழுது அடிக்கடி கதவை திறக்கக் கூடாது. உள்ளே தண்ணீர் சிந்தக் கூடாது, கதவு உடைய வாய்ப்பு உள்ளது.

ஒரு பவுல் அல்லது கப் தண்ணீரை மைக்ரோவேவில் சூடு செய்து அதில் தக்காளியை போட்டு எடுத்தால் நிமிடத்தில் தோலை நீக்கி விடலாம்.
எலுமிச்சைப் பழத்தை மைக்ரோவேவில் 20 நொடிகள் சூடு செய்து அதிக ஜூஸைப் பெற முடியும்.

மைக்ரோவேவ் ஓவனின் கதவை திறந்து வைத்திருக்கக்கூடாது.

நமத்துப் போன சிப்ஸ்,கார்ன்ஃப்லேக்ஸ், பிஸ்கட் வகைகளை ஒரு காட்டன் கர்ச்சீப் போன்ற துண்டு விரித்து அதில் பரத்தி வைத்து மூடாமல் ஒரு நிமிடம் சூடு செய்யலாம்.

சூடேற்றுவதற்கு முன் அனைத்து வகை திரவ உணவுகளை நன்கு கலந்து விட வேண்டும்.

ப்லேட்டில் சாதம்,உப்புமா போன்றவைகளை மறுசூடு செய்யும் பொழுது நடுவில் குழித்து விட்டுக் கொண்டால் ஒரு சீராக சூடேறும்.பின்பு கலந்து விட வேண்டும். உலோக தட்டுக்களைப் பயன்படுத்தக் கூடாது.
சூடு செய்ய, சமைக்க கண்ணாடி,பீங்கான் (போரோசில்,சைனாவேர்) பாத்திரங்களைப் பயன்படுத்தலாம்.

சில உணவுகளை பாதி சமையலை மைக்ரோவேவிலும், மீதியை வழக்கமான  முறையிலும் சமைத்தால் சுவையாகவும், விரைவாகவும் செய்து விடலாம்.

மீன் துரிதமாக வெந்து விடும்.அதிக நேரம் வைக்கக் கூடாது.மீன் துண்டுகளை அங்கங்கே கீறி விடவும்,இல்லையெனில் விண்டுவிடும்.
காகித தட்டுக்கள் பிளாஸ்டிக் சாமான் அதிக சூட்டில் உருகி கருகிப் போகும். எனவே அவற்றை தவிர்க்கவும்.

சமைக்க குறுகிய வாயுள்ள பாத்திரங்களை உபயோகிக்கக் கூடாது (பாட்டில் போன்றவை).சமைக்க குழிவற்ற பாத்திரங்கள் நல்லது.

டின் உணவுகளை மைக்ரோவேவில் டீஃப்ராஸ்ட் செய்யக் கூடாது.

ஆம்லெட்,புல்ஸையை மைக்ரோவேவில் பல நொடிகளில் சமைத்து விடலாம்,மஞ்சள் கருவை சிறிது களைத்து விட வேண்டும்,இல்லையெனில் வெடித்து சிதறி விடும்.

மைக்ரோவேவ் பாத்திரம் சூடேறாது, ஆனால் உள்ளிருக்கும் உணவின் சூடு பாத்திரத்திற்குப் பரவும்.

நறுக்கிய கீரை, காய்கறிகளை 2 நிமிடம் மைக்ரோ அவனில் வேக வைத்து எடுத்து பின்பு தாளிக்கலாம், நேரம் மிச்சப்படும்.

உணவை மூடி சமைத்தால் சமையல் துரிதமாகும்,உணவை மென்மையாக்கும். கண்ணாடி மூடியை எச்சரிக்கையாக கையாளவேண்டும். உணவு வகைக்கு தக்க ஸ்டாண்டிங் டைம் வைக்க நினைவில் கொள்ள வேண்டும்.

முப்பது நொடியில் ஒரு சொட்டு எண்ணெய் கூட இல்லாமல் மொறு மொறு அப்பளம் தயாரிக்கலாம்.

எலும்புடன் கூடிய இறைச்சி துண்டுகள் வெப்பத்தை கடத்தும் என்பதால் பக்கவாட்டில் எளிதாக வெந்துவிடும்.எலும்பில்லாத துண்டுகள் வேக நேரமெடுக்கும், ஆனால் ஒரு சீராக வெந்து விடும்.

உணவு பொருட்கள் உள்ளே வைக்காமல் சும்மா ஓவனை ஓட விடக்கூடாது.

சில்லிட்ட உணவுகள் சூடுபடுத்த அல்லது சமைக்க அதிக நேரம் எடுக்கும், குளிர் காலத்தில் உணவு வேகும் நேரம் கூடுதலாகும்.
உணவின் வகை, அளவு, அறையின் வெப்பநிலை பொறுத்து நேரம் வேறுபடும்.

மைக்ரோவேவில் அதிக நேரம் பொரிக்கிற  (டீப் ஃப்ரை)வேலை செய்யக் கூடாது.எண்ணெயின் வெப்பநிலை அதிகமாகும் பொழுது  மைக்ரோவேவினால் கட்டுப்படுத்த முடியாது.


இரண்டுக்கும் மேற்பட்ட கப்புக்கள் சூடு செய்யும் பொழுது அவற்றை  வட்டமாக வைக்க வேண்டும்.

பின் குறிப்பு:
ஓவன் டிப்ஸ்கள்  நினைவு வரும் பொழுது பின்பு சேர்க்கப்படும். கருத்தில் உங்களுக்கு தெரிந்த டிப்ஸ் தெரிவித்தால் இடுகையில் சேர்க்கப்படும்.